سؤال

May 5, 2007

هل تقدم على عمل شاق علماً بأن فرص نجاحك أقل من 10% .. بشرط أنك تعلم أن شخص ما قد قام به من قبل فهو ليس مستحيل .. و لكن فرصة النجاح ضئيلة جداً؟

فى حفلة فة كلية الهندسة للمغنى رامي صبرى النهارده

رغم إنى معرفش رامي صبرى اساسا

بس هما بيقولوا صوته شبه عمرو دياب

و بما إنى مبسمعش عمرو دياب قررت الحضور

الفكره ان الواحد طالع عين اللى خلفوه فى الكليه طول النهار

ايه المشكله فى حفلة تفك عنه شويه

اروح ياخويا قدام مبنى إعدادى الاقيلك شوية عيال من الإخوان ماسكين يفط و قاعدين قدامها … مش عايزين الحفلة

قال ايه … انهى أهم؟؟

شهداء فلسطين أم الحفلة ؟؟؟

ايه العبط دا ايه علاقة فلسطين بالحفله اساسا؟؟

و بعدين هما واقفين فى مكان الحفلة

يعنى لما ييجى الميعاد حاجة من الاتنين

يا حيحترموا نفسهم و يمشوا .. او يقفوا فى كان تانى .. من حقهم الإعتراض

يا إما حيفضلوا واقفين فى مكانهم

و ساعتها حيضطر الأمن للتدخل

و يطلع الإخوان شهدا المحرقة زى كل مره

محدش قال مش من حقك تعترض

بس إعتراض غير مضر

يعنى أقف جنب الحفلة و إرفع يفطك زى ما انت عايز

بس تقف فى مكانها و تعصلج

تبقى سياسة فرض الأمر الواقع

بمعنى اصح … بلطجة

أنا لسه رايح دلوقتى … حشوف ايه اللى حيحصل و ابقى احكيلكوا

——————

الإخوان لايموها و مشوا

ممكن بسبب الظهور المفاجىء و السريع بشكل يثير الدهشة لأمن الدولة و الرتب الكتيييييييير

أو ممكن بسبب الحشد الطلابى الكبير اللى كان مستنى الحفلة

أو ممكن يكونوا يأسوا من التأثير

او أى سبب اًخر

الله أعلم

المهم إنهم سابو مكانهم قبل الحفلة

و قعدوا يصوروا بنات و ولاد بيسقفوا طول الحفلة

و نشروا صورهم النهارده مع تعليق بأن ده اللى حصل إمبارح

“هو مش نشر صور الناس من غير إذن غلط ” ؟؟

بس ممكن يكون الناس من بره الكليه

المهم

الواد صوته كتاكيتى

و الحفلة كانت سلق بيض

ساعة إلا ربع و طلع يجرى

بس ججو الكلية إتغير

و أظن هو ده كان الهدف من الحفل أساسا

الخيانة

March 9, 2007

بارع أنت فى التخطيط

تعد الخطط بتلقائية بسيطة لحد الإذهال

و ناجحة فى معظم الأحيان

تحسب لكل خطوة حسابها

المكان … الزمان … الكيفية

تتوقع ردود الأفعال بدقة غريبة تحسد عليها

لا تتعجل أبداً

تنتظر اللحظة المناسبة للتدخل

كل الظروف في صالحك

حانت لحظة الحسم

صمت…..

هناك خطأ ما..

لم تتوقع الخيانة أبداً

لم تتوقع أن يخونك من كنت تظنه أوثق حلفاءك

تصاب بصدمه..

يتوقف عقلك عن التفكير..

تريد أن تسأله

يتصاعد غضبك

تريد أن تؤذيه

تريد أن تقتله

و لكن للأسف

لا فائدة فى الإنتحــــــار

  وضع الإخوان في  جامعات مصر محير جداً

يوم تلاقى الأمن نازل فيهم إعتقالات و بهدلة

و يوم تلاقيهم داخلين بسماعات و أجهزة و عربيات من باب الجامعة الرئيسى تحت سمع و بصر الأمن

فى كلية الهندسة جامعة الإسكندرية

وجود الإخوان أصبح شبه إدارة موازية للكلية

خصوصا مع موضوع الإتحاد الحر

فى الوقت اللى الحكومة بتضرب بكل عزمها فى الإخوان

تلاقى الإخوان فى الكلية الله ينور

لافتات فى كل حته .. عن كل حاجة عايزين يقولوها… موقعة بإسم التيار الإسلامى أو الإخوان المسلمين .

و فى أى مكان فى الكليه

 

دا حتى بقى ليهم شبه مكتب فى مدخل كل مبنى من المبانى

أنا لا أنكر الخدمات اللى بيقدموها للطلبة من ناحية ملازم الإمتحانات و إسطوانات البرامج و الكلام ده

على عينى و رأسى و إنا لكم لشاكرون

إنما الموضوع زاد عن حده

اما يدخل قبل كل محاضرة عيل يخطب خطبة الثلاثاء أو السبت ( الجمعة أجازة( يبقى الموضوع مش حلو

و دا رد الكلية الوحيد 

السؤال هنا..

هل حرية الحركة الغريبة دى مكفولة لجميع التيارات و الإتجاهات

أنا عمرى فى حياتى ما شفت حد غير الإخوان بيتحرك فى الجامعات … خالص

طيب حرية الحركة دى الحكومة بتدهالهم ليه ؟؟

عشان ترجع تقبض عليهم بعد كده ؟؟

يعنى أنا لو روحت أعمل نفس اللى بيعملوه الإخوان بس بأسم حزب تانى ..الحكومة حتسيبنى ؟؟

مش عارف؟؟

الموضوع فعلا زاد عن حده

لما يبقى كل التيارات بتتكلم فى الجامعة

يبقى ماشى

إنما دا مفيش غيرهم

بلاش … لو حرية الحركة فى الجامعة مكفولة للجميع

يبقى أهلاً و سهلاً

يعملوا اللى هما عايزينوا

طالما على الكل كليلة

إنما الموقف كدا غريب …

حد فاهم حاجة ؟؟ 

 

 

على مدى عمرى أتسألت السؤال ده كتير أوى

 

فى مواقف مختلفة و ظروف مختلفة

رد فعلى فى معظم الأحيان كان بيبقى بطىء شوية يسبقه محاولة لإكتشاف نوايا السائل من السؤال و التى غالبا ما تكون هايفة

إلا أنى لم أظن فى يوم من الأيام أن السؤال ده يكون غلط .. أو مش مناسب

إلا ان الزمن غير رأيى شويتين

أولا .. هو أنا لا زم ابقى يا مسلم يا مسيحى

تقوللى يعنى ايه ؟؟؟؟ عايز تبقى كافر؟؟

أقولك …. لو أنا سرقتك أبقى غلطت فى حق مين ؟؟

تقولى أنت ..

أقولك تمام .. لو أنا اتبعت دين غلط (فى وجهة نظر سعادتك) أو كفرت أبقى بغلط فى حق مين؟؟

حتجاوبنى بأجابتين حسب تفكير سعادتك

1-حتقوللى فى حق ربنا

2- حتقوللى فى حق نفسك

فى كلا الحالتين مش أنت ولا غيرك و لا أى سلطة دنيوية مسئولة عن محاسبتى

ببساطة لأنكم زيى بالظبط

اللى فيكوا يوصل للحقيقة الكاملة و كمال الدين

ييجى يحاسبنى

بخلاف ذلك محدش له عندى حاجة … طالما لم أكسر أى قوانين دنيوية

حاجة تانية بقى …

أنا مسلم …. أقولك .. بلاش انا

وقف أى مسلم فى الشارع

أسأله هل تؤمن أن المسيحية الموجودة حاليا دين من عند ربنا؟؟

بلاش

وقف أى مسيحى فى الشارع

أسأله .. هل تؤمن بأن الإسلام دين سماوى ؟؟

الإجابة القاطعة … لأ

انت شايف الاسلام صح … عشان كده انت مسلم

غيرك شايف دينه صح … عشان كده هو بيتبعه

أنا مش قادر أفهم ايه العلاقة بين إعتقادك أن دينك هو الحق و الصح و أن شخص ما يعتنق دين اخر

هو فرض دينه عليك ؟؟؟؟

قالك يا تتحول يا حنسلخك؟؟؟

واحد بهائى .. هو عايز يبقى بهائى

تخليه مسلم أو مسيحى بالعافية

أيه علاقة ان انت مش مقتنع بإن البهائية دين سماوى بإعتناق شخص ما انت ملكش علاقه بيه ليها

نقول تانى

انت شايف الاسلام صح … عشان كده انت مسلم

انت شايف المسيحية صح … عشان كده انت مسيحى

هو شايف اليهائية صح عشان كده هو بهائى

يا جماعة

لو فى حاجة أنا مش فاهمها فهمونى

حتى إشعار آخر … الرد على عنوان التدوينة هو

 

و أنت مال أهلك

***

أيضاً عند كلمتين و شغف و عصفورة فى الساحة

يوم

February 6, 2007

صحيت من النوم .الساعة 1:30. بتكلم فى التليفون . مش فاهم حاجة . فطرت . زورى بيوجعنى . بكتب فى البلوج . مش مركز . الساعة3 . بفكر أنزل . الجو وحش . بلعب  وار هامر . الساعة 5 . بتغدى . التليفون تانى . ابتديت أقرأ التلصص . زورى مولع نار . مضاد حيوى و خافض . صفحة 175. لسه مش فاهم حاجة .  صوت خبط فى الزجاج . الدنيا بتمطر تلج . العمارة بتتهز . اعلى صوت رعد سمعته فى حياتى . بتعشى .خلصت التلصص. غريبة . كالعادة . الساعة 2:30 . بفتح الكومبيوتر . بكتب الكلام ده . دايخ . حاسس أن حيغم عليه . حنام أحسن
أخيرا أوروبا قررت تقلب على السى آى ايه

عشان واحد ألمانى من أصل لبنانى اتخطف من مقدونيا
و أترحل على فين ؟؟.. حزروا فزروا
طيب و واحد تانى مصرى إيطاليا بتحقق فى إختطافه
و إترحل على فين ؟…. برضوا حزروا فزروا
بس دا مرجعش بقى ..

على رأى أم الليمبي
هو اللى عند الحكومة بيرجع

Fuck Ubuntu

January 30, 2007

hey guys check this

Fuckubuntu.com

and guess where it leeds to .. lol
this is funny 🙂


انا كنت قزاز و حوجنى الزمان لـلـ لطخ

و بقيت ساكن فى بيت جدرانه تستحق اللطخ

هو انت يا لوح معداش عليك نجار.. قضيت زمانك معايا و انت لسه برضوا لطخ

نكت

January 10, 2007

عماد.. اتعذب و أتهتك عرضه و ….
اه .. إتحبس 3 شهور مع النفاذ
الحكم بالحبس 3 شهور علي ضحية التعذيب
 تانى نكته
لو فقير و عيان ….
موت أرحملك
ارتفاع أسعار أدوية مهمة بنسب تتراوح بين 10% و100% 


 تالت نكته معانا التهاردة فى البرنامج
و أنا نازل الكلية من يومين عديت فى شارع قناة السويس و لقيت الدنيا مقلوبة
و كل 100 متر فى واحد بلاسلكى
سألت سواق التاكسى .. قال يمكن فى حد بيزور المكتبة
معلش مكنش يعرف ان مولد سيدكوا و سيد البلد أبو حصيرة وصل
حالة طواريء قصوى لتأمين اليهود بمولد أبوحصيرة 


اه شوفتوا نسيت إزاى ..
إحنا بنقزز ب 220 مليون جنيه فى السنه
يعنى من دلوقتى جيب حصالة .. و كل ما نفسك تهفك على لب أو سودانى
حط الفلوس فى الحصالة
و حتبقى مليونير على احر السنة …
حاجه تفقع