ممكن تسمعوا كلام ابوها و أخواتها بيتكلموا…. محدش فكر يقتلها أو يقاطعها أو يعمل أى حاجة … هي حرررررررررررررررررررررررررررررررررة … يا رب تكون الفكرة وصلت

Advertisements

على مدى عمرى أتسألت السؤال ده كتير أوى

 

فى مواقف مختلفة و ظروف مختلفة

رد فعلى فى معظم الأحيان كان بيبقى بطىء شوية يسبقه محاولة لإكتشاف نوايا السائل من السؤال و التى غالبا ما تكون هايفة

إلا أنى لم أظن فى يوم من الأيام أن السؤال ده يكون غلط .. أو مش مناسب

إلا ان الزمن غير رأيى شويتين

أولا .. هو أنا لا زم ابقى يا مسلم يا مسيحى

تقوللى يعنى ايه ؟؟؟؟ عايز تبقى كافر؟؟

أقولك …. لو أنا سرقتك أبقى غلطت فى حق مين ؟؟

تقولى أنت ..

أقولك تمام .. لو أنا اتبعت دين غلط (فى وجهة نظر سعادتك) أو كفرت أبقى بغلط فى حق مين؟؟

حتجاوبنى بأجابتين حسب تفكير سعادتك

1-حتقوللى فى حق ربنا

2- حتقوللى فى حق نفسك

فى كلا الحالتين مش أنت ولا غيرك و لا أى سلطة دنيوية مسئولة عن محاسبتى

ببساطة لأنكم زيى بالظبط

اللى فيكوا يوصل للحقيقة الكاملة و كمال الدين

ييجى يحاسبنى

بخلاف ذلك محدش له عندى حاجة … طالما لم أكسر أى قوانين دنيوية

حاجة تانية بقى …

أنا مسلم …. أقولك .. بلاش انا

وقف أى مسلم فى الشارع

أسأله هل تؤمن أن المسيحية الموجودة حاليا دين من عند ربنا؟؟

بلاش

وقف أى مسيحى فى الشارع

أسأله .. هل تؤمن بأن الإسلام دين سماوى ؟؟

الإجابة القاطعة … لأ

انت شايف الاسلام صح … عشان كده انت مسلم

غيرك شايف دينه صح … عشان كده هو بيتبعه

أنا مش قادر أفهم ايه العلاقة بين إعتقادك أن دينك هو الحق و الصح و أن شخص ما يعتنق دين اخر

هو فرض دينه عليك ؟؟؟؟

قالك يا تتحول يا حنسلخك؟؟؟

واحد بهائى .. هو عايز يبقى بهائى

تخليه مسلم أو مسيحى بالعافية

أيه علاقة ان انت مش مقتنع بإن البهائية دين سماوى بإعتناق شخص ما انت ملكش علاقه بيه ليها

نقول تانى

انت شايف الاسلام صح … عشان كده انت مسلم

انت شايف المسيحية صح … عشان كده انت مسيحى

هو شايف اليهائية صح عشان كده هو بهائى

يا جماعة

لو فى حاجة أنا مش فاهمها فهمونى

حتى إشعار آخر … الرد على عنوان التدوينة هو

 

و أنت مال أهلك

***

أيضاً عند كلمتين و شغف و عصفورة فى الساحة


تم أخيراً نقل مجمع المدونات المصرية إلى موقع مستقل
بصراحة علاء كان صعبان عليه و كان لازم يعمل كده … يا ريت الناس تدوس على إعلان فى كل زيارة للمجمع
عشان تتجمع فلوس الإستضافة و تكاليف المجمع اللى بقيت وهمية.


***
كريم و صدام


مش عارف ليه بحس ان ظروفهم متشابهة إلى حد ما
على الأقل بالنسبة لي
فكلاهما لا أملك ذرة تعاطف معه
بل بالعكس … أتمنى محاكمتهم.
ولكن أى محاكمة
محاكمة هزلية كما حدث لصدام
أم تعسف و ظلم و حبس إنفرادى كما يحدث لكريم
أنا لست ضد حرية الرأى فى موضوع كريم
من حقه أنه يكفر
و لكن مش من حقه أنه يسب المسلمين
و فى نفس الوقت من حقى أنى أبقى مسلم
بس مش من حقى أنى أسب غير المسلمين
بهذه البساطة
أنا مع محاكمة كريم
و لكن محاكمة مدنية طبقاً للقانون كأى شخص آخر.
بدون أى تمييز أو تعصب .
محاكمة مدنية مش من بتوع أمن الدولة .
ميكفر ولا يتنيل.
القانون يعاقب على أفعال معينه و لا يعاقب على الدين
حاكموه على أفعاله و ليس على عقيدته.
فقط عاملوه كما يعامل البقية …

أما صدام (فى رأيى) فكديكتاتور و سفاح هو يستحق الإعدام
و لكن أيضا كان يستحق محاكمة عادلة و ليس مسرحية هزلية..
من الممكن أن اكون مخطأ فى التشبيه ككل ..فقط اردت توصيل الفكرة

***

من فترة كده منعت فرنسا إرتداء أى رمز دينى فى المؤسسات الحكومية و لم يخصوا دين واحد بالقرار
و طبعا قامت الدنيا و مقعدتش … إزاى فرنسا تطلب من النساء المسلمين انهم يقلعوا الحجاب فى الشغل
و اليومين دول فى خبرين قريبين من بعض
و احد .. إن جاك سترو طلب من النساء المسلمين ان لا يرتدوا النقاب
و طبعا الخبر تصدر معظم مواقع الأخبار
اتنين.. منع تونس رسميا ارتداء الحجاب فى الاماكن العامة و حرمان من ترتديه من التعليم و الخدمات العامة
و طبعا الخبر مذكور بعنوان صغير و معظم وكالات الأنباء العربية تجاهلته اساسا
بقصراحة مش عارف اقول ايه
أنا ححط إقتباسات و إحكموا انتوا

هاجمت بعض الجماعات الإسلامية جاك سترو لتصريحاته حول حجاب الوجه، وإن أعربت هيئة إسلامية رئيسية عن تفهمها.

وكان جاك سترو قد أعرب عن التماسه أن تنزع النساء المسلمات النقاب إن لم يمانعن حيث قال إن عدم كشف تعبيرات الوجه لا يساعد في التواصل بين الأفراد من خلفيات مختلفة.

غير أن سترو لم يقل إنه سيرفض الاجتماع بالمسلمات اللاتي يؤثرن عدم الكشف عن وجوههن رغم تفضيله قيامهم بذلك.

و من الجانب الاخر

دافع الأمين العام لحزب التجمع الدستوري الديمقراطي “الحاكم” في تونس عن قرار الحزب الأخير القاضي بمنع النساء من ارتداء الحجاب في الأماكن العامة

إذا قبلنا اليوم الحجاب فقد نقبل غدا حرمان المرأة من حقها في العمل والتصويت ومنعها من الدراسة ، وأن تكون فقط أداة للتناسل والقيام بالأعمال المنزلية


وأضاف متهما الحجاب بأنه سيكون السبب في “إعاقة عجلة التقدم في البلاد والعودة بها خطوات إلى الوراء ، وأنه ينال من أحد المقومات الأساسية التي يقوم عليها استقرار المجتمع”.


وأشار المْهني إن القرار الحكومة إلى أن القرار يحمي المواطنين من مخاطر التطرف الديني الذي يواصل انتشاره في البلاد ، على حد زعمه.

Sources:
http://news.filbalad.com//News.asp?NewsID=15750
http://news.bbc.co.uk/hi/arabic/worldnews/newsid5413000/5413616.stm

زيارة لموقع
freecopts.net
حسستنى بألم فظيع
أنا مش ضد أن الأقباط يكتبوا و يقولوا احنا مضطهدين
لأ
حقهم .. هما فعلا بيحصلهم كتير
علم يميز هويتهم
حقهم.. و محدش يقدر يتكلم فيه
بالعكس نتكلم معاهم و نحاول على قد ما نقدر نحقق العدل فى بلد العدل خد منها أجازة من زمان
لكن لما يكون محتوى الموقع موجه ضد الإسلام أكتر منه موجه فى مصلحة الأقباط
زى ما يكون الأتنين مينفعش يتوجدوا مع بعض
يعنى اما يكون 60% من الموقع محاولة اثبات أن الإسلام دين عنف و أتباعه أجهل من البقر و حيوانات
و تقريبا مفيش أى محتوى او محاولات حتى لكيفية حل المشكلة الموجودة فى مصر
الموقع ده و المواقع اللى زيه
بتدى للقارىء إنطباع أن عشان المسيحيين يعيشوا بأمان فى مصر لازم الإسلام ينتهى من مصر تماما
يعنى سؤال واحد
هل دا فعلا الحل الوحيد اللى  قدرتوا تطلعوا بيه؟
فعلا؟؟؟؟
اه فى تفرقة فى مصر
و حوادث الواحد يخجل حتى انه يجيب سيرتها من جهلة بيعتقدوا انهم بيتحركوا بإسم الدين
طيب و الحل؟؟
أما تقعدوا تشتموا فى الإسلام و المسلمين العدل حيتحقق؟؟؟
حتخدوا حقوقكوا؟؟
لا المسيحيين حيخلصوا و لا المسلمين حيخلصوا مهما حصل
و حتفضل مصر دولة عايش فيها ديانتين
أما تقعدوا تشتموا فى دين .. فكركوا يعنى مش حتلاقوا حد فى الدين التانى يقعد يشتم فدينكوا
طيب و النتيجة
قلولى طيب ايه الفكرة
عمال أفكر فى هدف واضح مش لاقى
عايزين ضغط خارجى مثلا
عمر ما الضغط لا خارجى و لا داخلى ولا أى حاجة خالص
يغير اللى فى قلوب الناس
بصراحة … أنا مش فاهم أنتوا بتفكروا إزاى
—-
ملحوظة
——–
الكلام موجة لمن يكتب فى هذه المواقع و من يتفق معاها فى الرأى فقط


الأنبا ماكسيموس الأول راعي كنيسة المقطم المنشقة علي الكنيسة الأرثوذكسية الأم،التي يقودها البابا شنودة الثالث بابا الإسكندرية وبطريرك الكرازة المرقسية،
تأسيس مجمع مقدس للمسيحيين الأرثوذكس في مصر والشرق الأوسط، ليصبح موازيا للمجمع المقدس للكنيسة الأم،
في أول محاولة للانشقاق علي البابا شنودة والكنيسة الأرثوذكسية.
وقال الأنبا ماكسيموس الأول لـ «المصري اليوم»: قررت إقامة المجمع المقدس لمجابهة كنيسة البابا شنودة ومعالجة العوار الذي أصابها علي جميع المستويات.
وأضاف: سأقوم برسم ثلاثة أساقفة مساعدين لي كبداية ستكون نواة لعمل أبرشيات في كل أنحاء مصر، حيث سيعمل أحد الأساقفة الثلاثة في أبرشيات شبرا ويكلف بالدلتا، والثاني في مصر الجديدة ويكلف بمدن القناة، والأخير في المقطم ويكلف بجنوب القاهرة والصعيد، وذلك كخطوة أولي تتبعها خطوات أخري.
وقال ماكسيموس: إن قراري لا يعد فرصة لعزل البابا شنودة كما تردد، لأننا أخذنا قراراً بتأسيس المجمع قبل مرض البابا، ونحن نقوم بعملية إصلاح كنسي كبيرة للكنيسة الأرثوذكسية، ولا توجد فرصة لعزل البابا لأن حالته الصحية متدهورة في الأساس. وأضاف: «البابا شنودة وكنيسته أحدثا خروقات كثيرة، وبدورنا نسعي لإصلاح ما أفسدته قيادات الكنيسة».
من جانبه استنكر القمص صليب متي ساويرس «عضو المجمع الملي بالكاتدرائية» قرار ماكسيموس،
وقال لـ«المصري اليوم»: هذا القرار خطير ونذير انشقاق كبير للكنيسة الأم. وحمل ساويرس مسؤولية هذا الانشقاق للحكومة،
وقال: «لقد اعترفت الحكومة بكنيسة ماكسيموس، رغم انشقاقها علي الكنيسة الأم، تنفيذاً لأوامر أمريكية، بينما البابا شنودة رفض الاعتراف به»، داعياً المسيحيين في مصر والشرق الأوسط إلي عدم الاعتداد بقرار ماكسيموس، وقال: «ما يحدث أمر خطير لا يمكن السكوت عليه». إلي ذلك يعقد الأنبا ماكسيموس مؤتمراً صحفياً غداً الأحد، لإعلان إنشاء المجمع المقدس.

 

انا معرفش عن الموضوع حاجه فا مش حعلق عليه

الموضوع من هنا 

التدوينة دى فيها كذا موضوع حقولهوم بترتيبهم فى العنوان
 
اولا حكاية اللاعب الغانى اللى رفع علم اسرائيل
ببساطه هو حر و محدش له دعوه يا ترى لو كان رفع علم دوله تانية كنا زعلنا كده
طيب بلاش لو رفع علم فلسطين و الفيفا قاليتلوا حاجة كنا عملنا ايه
هو بيلعب فى اسرائيل و بيحبها
هو حر
ميقصدش يعادى اى حد تانى او يهين حد ببساطة كان بيورى الناس انه بيحب اسرائيل
و يمكن كان بيعمل كده عشان ياخد الجنسية
هو حر
==============
اوقات فراغ
بصراحة انا دخلت الفيلم ده و انا مخنوق و داخل اساسا عشان صحابى  بس
لكن كنت غلطان .. الفيلم جامد جداً و بيصور حالة الشباب المصرى بصوره مشوفتش فى صدقها قبل كده
انا ارفع قبعتى و اقف احتراما لكل من شارك فى هذا الفيلم 
بصراحة يا جماعة الفيلم يستحق تمن التذكره ادخله و متدعيش عليه
=========
دافنشى كود
انا شايف ان الفيلم ده لو اتعرض فى مصر كانت حتبقى غلطة كبيره اوى من الحكومه
كانت حتبقى ببساطه ازدواجية معايير
طالما الافلام اللى بتتناول الاسلام بمنظور احنا مش موافقين عليه اتمنعت يبقى التانية لازم تتمنع هى كمان
مينفعش نمنع فيلم يسىء للاسلام و نعرض فيلم يسىء للمسيحية
مينفعش
با نعرض كله يا نمنع كله
و يا ريت المدونين كمان ميوقعوش فى الموضوع ده 
اول مرة فى حياتى أمشى فى مظاهرة
 بصراحة كنت مرعوووب و فكرت كذه مره انى مروحش لكن زيارة واحدة لمقهى الانترنت وطله اصغر على تدوينة جار القمر خلتنى مصمم اروح
أنا مش حوصف المظاهرة لان فى ناس كتيرة اوى حتوصفها و انا مش بارع اوى فى الوصف بينى و بينكوا
فحقول شوية حاجات بس
 
تفاعل الناس كان جبار يتراوح بين الفرحة و عدم التصديق و الشك فيما يقال و من يقوله
فى بنت مسيحية صغيرة .. يعنة ثانوى كده.. لما قلنا الاعتذار للأقباط رفعت حواجبها فى دهشة و قالت لزميلتها (المحجبة) اللى واقفه جنبها : يا سلاااااام بعدم تصديق و زهول تام 
 وفى ناس طلعت تزغرت و ناس مسكت اعلام مصر فى البلكونات وناس عماله تبص من بعيد و تتكلم فى سرها معانا بس قلقانين يدخلوا
عارفين ليه
عشان ام الشعارات الكتير بتاعت ستين مليون حزب و حركة
هدف المظاهرة كان واضح لازمتوا ايه بقى حزب فلانى و حركة علانى
معظم اللى واقفين كان راهبهم الموقف ونفسهم يدخلوا بس كمية الشعارات و اسامى الاحزاب كانت مخوفاهم
لكلام ده من الناس للناس
المفروض يعنى!!!!ا
 اللى ضايقنى ان الهتافات شطحت فى الاخر بعيد عن الموضوع الرئيسى
دا حتى فى مرحلة من المراحل الناس كانت بتقول مصر على الطبلة زى ما كانوا بيشجعوا فى كأس الامم
و على وتيرة مصر و نيجيريا بيلعبوا بتشجع مين
بدأ مالك و علاء يشجعوا ماليزيا
دوم دوم   دوم دوم ماليزيا )  

المظاهرة كانت من امتع و احسن الايام و الاحداث فى حياتى
 عارف لما تقف فى وسط ميدان و تصرخ بأعلى صوتك و تقول كلمة حق
واللى واقف جنبك بيقول معاك
 انت مش فى دماغك دا مسلم او مسيحى مش فارقه دا اخوك واقف بيهتف معاك كتفه فى كتفك
ميفرقش عنك فى حاجه خالص
بيحبك .. اه و الله بيحبك
 وانت بتحبه … تصدق
 ليه..؟  سؤال غريب
عشان مصرى طبعا
عشان مصرى و بس
لا يهمنى لونك لايهمنى دينك لا يهمنى عنوانك
يهمنى الانسان 
مصر بتاعتنا كلنا
مسلمين و مسيحيين
و مسيحيين و مسلمين
الصليب مع الهلال
و الهلال مع الصليب 
لما الهتاف بيعلى كنت بتشوف فى وشوش الناس (مسلم و مسيحى) حاجة غريبة
أمل على فرحة على استغراب 
زى ما يكونوا نفسهم يقولوا الكلام ده من زمان و مش قادرين
او مش عارفين 
الموضوع اقل ما يوصف بيه انه جميل
بكل ما فى الكلمة من رقة و رقى و روعه
لو كنت فوت اليوم ده كنت ضربت نفسى مليون بتاعة
كنت حموت على كاميرا و حرمت امشى من غيرها بعد كده
 
زعلت اوى عشان اضطريت امشى بدرى (7:30كده)عشان الحق اخر قطار
و مستنى التدوينات تنزل عشان اعرف ايه اللى حصل 
 
انا برضة مش مقتنع ان اللى حصل ده كفاية ولازم المظاهرة دى تتعمل فى الاسكندرية
لازمان وحاتمان و ضارورى 
الصور الوحيدة اللى نزلت لغاية دلوقتى عند بيج فاروه 
 
ملحوظة: 
احساس جبار و احنا واقفين فى وسط الميدان و بنشاور على صورة مبارك وبنقول الحرامى اهوه
جباااااااااااااااااااار 

 

ليكن المواطن المصري نصحي جرجس آخر ضحايا الطائفية والتعصب في مصر

دعوة للتظاهر

الخميس 20 ابريل الساعة الخامسة مساء

دوران شبرا – محطة مترو روض الفرج

هل الأمن متواطئ ؟
لا أقل من القبض على القتلة ومعاقبتهم ..

لا للطائفية .. لا للتمييز الديني .. لا لاضطهاد المسيحيين
نعم للمساواة .. نعم لحرية الاعتقاد

 

حسبي الله ونعم الوكيل اقولها مع اخي المسيحي المظلوم …علي…اخي المسلم الظالم

ولا يقلل ذلك من اسلامي في شئ

حسبي الله ونعم الوكيل

حسبي الله ونعم الوكيل

حسبي الله ونعم الوكيل

هلا قلتم معي اذن

اللهم اني ابرا اليك مما صنع هؤلاء ؟؟؟

تدوينة ابن عبد العزبز